Newsletter

Breaking News

Rurumba Adventure Race san LGU-San Jose, first runner-up san Best Tourism Event: Sports and Adventure-Municipal Level san DOT-ATOP Pearl Awards



Catarman, Northern Samar – Nagdaog komo first runner-up an Rurumba Adventure Race of Nostra, Inc. san bungto san San Jose san Best Tourism Event: Sports and Adventure-Municipal Level sa ginbuhat nga Pearl Awards Night  san 19th National Convention of the  Association of Tourism Officers of the Philippines (ATOP) didto sa Cagayan de Oro City san diri pala maiha.  Mao ini an nahibaroan kan Josette Doctor, provincial tourism officer san probinsya san Norte san Samar nga mao liwat an Vice-President for Visayas  san ATOP.

Segun kan Doctor, an Pearl Awards in 14 katuig na ginbubuhat san ATOP kasugbong an Department of Tourism (DOT) agud matagan sin pagkilala adton mga lokal nga panggobyernuhan o LGUs ngan an kanira mga kasugbong para san ira mga panalinguha nga ig-undong ngan mapauswag an turismo sa ira lokalidad pinaagi sin mga events, aktibidad, programa ngan proyekto ngan ini an nagsasayuan la nga award-giving body para san turismo sa bug-os nga Pilipinas. An Norte san Samar in una pala nga nag-api sini nga prestihiyoso nga paisan-isan pinaagi san Rurumba Adventure Race of Nostra, Inc.  diin first runner-up ini sa Abre Grande Lawig san Palompon, Leyte nga mao an grand winner ngan second runner-up an Pulilan Bike Fest san Pulilan, Bulacan ug gintagan sin special citation an Tanay Rodeo san Tanay, Rizal.

An Nostra, Inc. nga mao an organizer sini nga Rurumba Adventure Race in ginkokomponer sin mga outdoor enthusiasts diin walo na katuig nira nga ginhihimo ini nga event samtang duha naman katuig na nga gin-isponsoran san LGU-San Jose.

Bahin sini, nagpadangat naman sin mapaso nga pag-congratulate si Gob. Jose Ong sa LGU-San Jose ngan Nostra, Inc. sa dungog nga nakuha sini ngan ginlalauman nga makabulig ini sa pag-undong san turismo sa probinsya.

Nahibaroan liwat kan Doctor nga an guest speaker san nasabi nga ATOP convention mao si Secretary Martin Andanar san Presidential Communications  Operations Office (PCOO) ngan keynote speaker naman si Senador JV Ejercito sa pag-abri san plenary session kun diin nagin topiko an “Tourism and the Digital Transformation” ngan “Digital Impact Sourcing in Tourism Development”. Pira san mga aktibidad san katitirok mao press conference, parade, immersion tours, solidarity night, ngan business meeting.

An katitirok in gintambungan sin maharani mil nga mga partisipantes tikang sa mga LGUs, pribado nga sektor, academe san 17 nga rehiyon sa bug-os nga nasud.

No comments

close(x)

Covid-19 Update

New Recoveries: 0
Total Recoveries: 152
Deaths: 2
New Cases: 1
Active Cases: 188
Total Cases: 342