Newsletter

Breaking News

Gob. Ong, nagpagawas sin EO pag-establisar sin Smoke-Free PGNS ngan pagbug-os sin Smoke-Free Task Force


Catarman, Northern Samar – Agud maprotehiran an panlawas san mga Nortehanon san Probinsya san Norte san Samar  sa mga sakit nga dara san paninigarilyo sugad san stroke, sakit sa puso ngan baga, kanser, ngan iba pa, nagpalusad si Gob. Jose Ong Jr. san diri pala maiha sin Executive Order numerado 01-06-18 series of 2018 pag-establisar sin Smoke-Free Provincial Government of Northern Samar (PGNS) ngan pagbug-os sin Smoke-Free Task Force.

An kasuguanan in nasakop sa ngatanan nga mga empleyado san Gobyerno Probinsiyal san Norte san Samar ug sugad man san mga kliyente, bisita, ngan mga service provider nga ada sa sulod san mga establisyemento o istruktura nga gintatagyaon ngan ginpapadalagan sini.

Kaupod san igindidiri nga mga akto mao an pagsigarilyo sa sulod san mga establisyemento ngan mga behikulo o service vehicle san PGNS,  pagbaligya ngan pagdistribwer sin sigarilyo ngan iba pa produkto san tabako o tobacco products sa sulod san mga establisyemento san PGNS.

An penalidad san masupak sini nga kasuguanan mao an mil pesos para san una nga pagtalapas, dos mil pesos sa ika-duha nga pagtalapas, ngan tres mil pesos sa ika-tulo nga pagtalapas o kaprisuhan nga diri mahamubo sa tulo kaadlaw ngan diri malahos sa unom kaadlaw o magkapareho depende sa discretion san korte.

An PGNS Smoke-Free Task Force in ginkokomponer san Provincial Administrator komo chairperson, Provincial Health Officer komo co-chair, Provincial Legal Officer komo vice-chair ngan kaapi an  Chief Security Officer, Provincial Treasurer, Provincial Government Environment and Natural Resources Officer ngan Provincial Director san Northern Samar Police Provincial Office komo mga miyembro.

Ginbasaran san nasabi nga Executive Order an mga balaudnon nga 1987 Constitution, Republic Act No. 7160 o an Local Government Code of 1991, Philippine Clean Air Act of 1991, Ordinance No. 12 series of 2009 o The Smoke-Free Ordinance of the Province of Northern Samar, ngan an EO No. 26 o Providing for the Establishment of Smoke-Free Environments in Public and Enclosed Places  nga ginpalusad ni Presidente Rodrigo Duterte san Mayo 16, 2017.

-30-

No comments

close(x)

Covid-19 Update

New Recoveries: 0
Total Recoveries: 208
Deaths: 4
New Cases: 0
Active Cases: 299
Total Cases: 511